Orta maaş 528 manatı ötüb
Dövlət Statistika Komitəsi iqtisadiyyatda işləyənlər və əməkhaqqı barədə hesabat yayıb. Novator.az bildirir ki, rəsmi açıqlamaya görə, 2018-ci il yanvarın 1-nə ölkə iqtisadiyyatında muzdla çalışan işçilərin sayı 1 milyon 521,3 min nəfər olub, onların 880,1 min nəfəri dövlət sektorunda, 641,2 min nəfəri qeyri-dövlət sektorunda fəaliyyət göstərib.
Muzdla işləyənlərin 21,9 faizi təhsil, 19,2 faizi ticarət; nəqliyyat vasitələrinin təmiri, 12,9 faizi sənaye, 8,6 faizi əhaliyə səhiyyə xidmətləri və sosial xidmətlərin göstərilməsi, 7,1 faizi dövlət idarəetməsi və müdafiə; sosial təminat, 6,6 faizi tikinti, 4,6 faizi nəqliyyat və anbar təsərrüfatı, 3,4 faizi peşə, elmi və texniki fəaliyyət, 3,2 faizi kənd təsərrüfatı, meşə təsərrüfatı və balıqçılıq, 1,6 faizi maliyyə və sığorta fəaliyyəti, 10,9 faizi iqtisadiyyatın digər sahələrində məşğul olublar.
İşçilərin orta aylıq nominal əməkhaqqı 2016-cı ilə nisbətən 5,7 faiz artaraq 528,2 manata çatıb.
Bakı Şəhər Statistika İdarəsinin hesabatına əsasən, 2017-ci ilin yanvar-noyabr aylarında paytaxtda işçilərin orta aylıq nominal əməkhaqqı 6,5 faiz artaraq 782 manata yüksəlib.
