Nazirlikdən yanvar açıqlamaları
Əmək və Əhalinin Sosial Müdafiəsi Nazirliyi yanvar ayı üzrə iki hesabat yayıb. Elektron xidmətlər hesabatında bildirilir ki, 2017-ci ilin dekabr ayı ilə müqayisədə e-xidmətlərdə 82,8 faiz çox olmaqla, 1 milyon 123 minə yaxın müraciət qeydə alınıb.
Müraciətlərin sayında ən çox artım “Məcburi dövlət sosial sığortası üzrə hesabatların təqdim edilməsi” e-xidməti üzrə qeydə alınıb. Bu e-xidmətə yanvarda əvvəlki ayla müqayisədə 16,5 dəfə çox, 394 min 700 dəfə müraciət olunub. “Əmək müqaviləsi bildirişlərinin qeydiyyata alınması və bu barədə işəgötürənə məlumatın verilməsi” e-xidmətindən 37,1 faiz çox olmaqla 310 min 278 dəfə, “Sığortaolunanlara məlumatların verilməsi” e-xidmətindən 38,9 faiz çox olmaqla 32 min 374 dəfə, “Əmək müqaviləsi bildirişləri barədə məlumatların işçilər tərəfindən əldə edilməsi” e-xidmətindən 18,9 faiz çox olmaqla 29 min 570 dəfə istifadə edilib.
Nazirliyin digər hesabatında bildirilir ki, ötən ay əlilliyi olan şəxslər 1820 protez-ortopedik məmulat və reabilitasiya vasitəsi ilə təmin edilib. Onların 105 ədədini yuxarı və aşağı ətraf ortezi, 72 ədədini yuxarı və aşağı ətraf, habelə döş protezi, 447 ədədini müxtəlif reabilitasiya vasitələri, 41 ədədini bel və boyun nahiyəsi üçün korset təşkil edib. Əlilliyi olan şəxslərə 20 cüt protez ayaqqabı, 364 cüt ortopedik ayaqqabı, 82 ədəd dördayaqlı dayaq vasitəsi, 92 cüt dirsəkaltı ağac, 52 cüt qoltuqaltı ağac, 148 ədəd əsa verilib. Son bir ayda tibbi göstərişi olan əlil şəxslərə isə 225 ədəd əlil arabası təqdim olunub.
Ötən ay ümumilikdə 965 nəfər əlilliyi olan şəxsə protez-ortopedik bərpa xidmətləri göstərilib. Həmin şəxslərin 95 nəfəri ölkənin ərazi bütövlüyünün, müstəqilliyinin və konstitusiya quruluşunun müdafiəsinə görə əlil olmuş vətəndaşlardır.
