Elman Rüstəmovdan inflyasiya proqnozu
Mərkəzi Bankın valyuta ehtiyatları 34% artaraq ilin sonuna 5,3 milyard ABŞ dollarına çatıb. Bunu 2017-ci ilin yekunlarına həsr olunmuş 3 fevral iclasında İdarə Heyətinin sədri Elman Rüstəmov deyib. O qeyd edib ki, 2017-ci ildə makroiqtisadi sabitlik meyllərinin yaranması qeyri-neft sektorunda iqtisadi artımın bərpasına şərait yaradıb: “Ötən il qeyri-neft sektorunda ümumi daxili məhsul real olaraq 2,7% artıb. Xarici tələblə yanaşı daxili tələb iqtisadi artımda mühüm rol oynayıb, dövlət büdcəsi xərcləri daxili tələbə təsir edən mühüm amillərdən biri olub.
2017-ci ildə inflyasiya gözləntiləri stabilləşib. Pul siyasətinin əsas əməliyyat hədəfi olan manatla pul bazası 8,7% artıb, bu da qeyri-neft sektoru üzrə iqtisadi artım tempini əhəmiyyətli üstələyir. Valyuta bazarında təklifin tələbi üstələməsi şəraitində manat ilin əvvəlindən 4% möhkəmlənib.
Tədiyyə balansının profisiti ölkənin strateji valyuta ehtiyatlarının artmasına şərait yaradıb. Strateji ehtiyatlar 2017-ci ilin əvvəlinə nəzərən 4,2 milyard dollar artaraq ilin sonuna 42 milyard ABŞ dolları təşkil edib. Mərkəzi Bankın valyuta ehtiyatları isə 34% artaraq ilin sonuna 5,3 milyard ABŞ dollarına çatıb”.
Elman Rüstəmov deyib ki, hökumətin birrəqəmli inflyasiya proqnozunu da nəzərə almaqla Mərkəzi Bank 2018-ci ildə inflyasiyanı 6-8% civarında saxlamağa çalışacaq”.
Novator.az xatırladır ki, 2017-ci ildə istehlak məhsullarının və xidmətlərin qiymətləri 2016-cı ilə nisbətən 12,9 faiz, o cümlədən ərzaq məhsullarının qiymətləri 16,4 faiz, qeyri-ərzaq mallarının qiymətləri 11,6 faiz, əhaliyə göstərilən ödənişli xidmətlərin qiymətləri 9,3 faiz artıb.
