Vətəndaşlıq qanununa dəyişiklik edildi
Milli Məclisin 1 fevral iclasında “Azərbaycan Respublikasının vətəndaşlığı haqqında” qanunda dəyişikliklər edilib. Novator.az-ın məlumatına görə, qanunun 14-cü maddəsinə (Azərbaycan Respublikasının vətəndaşlığına qəbul ) yeni hissə əlavə olunub: “2006-cı il yanvarın 1-dək Azərbaycan Respublikasına gələrək burada daimi yaşayan, heç bir dövlətin vətəndaşlığına mənsub olmayan və şəxsiyyətini təsdiq edən etibarlı sənədləri olmayan şəxsin heç bir dövlətin vətəndaşlığına mənsub olmaması, habelə Azərbaycan Respublikasında daimi yaşaması faktını məhkəmə müəyyən edir. Bu müddəa könüllü olaraq mənsub olduğu dövlətin vətəndaşlığından çıxmış şəxslərə şamil edilmir”.
“Azərbaycan Respublikasının vətəndaşlığı haqqında” qanuna əsasən, əcnəbinin və ya vətəndaşlığı olmayan şəxsin Azərbaycan Respublikasının ərazisində daimi yaşama müddəti ona qanunvericiliklə müəyyən edilmiş qaydada daimi yaşamaq üçün icazə və ya qaçqın statusu verildiyi gündən hesablanır.
Yeni hissədə nəzərdə tutulan hal istisna təşkil edir.
Parlamentin 1 fevral iclasında “Dərman vasitələri haqqında” qanunda da dəyişiklik edilib. Yenilik on dörd yaşı tamam olmamış şəxslərə dərman vasitələrinin buraxılmasına qadağa qoyur.
