Özbəkistanda yeni təyinatlar
Yanvarın 31-də Özbəkistanın Milli Təhlükəsizlik Xidmətinə yeni sədr təyin olunub: İxtiyar Abdullayev. Bu təyinatadək baş prokuror postunu tutan İxtiyar Abdullayevin 51 yaşı var.
Milli Təhlükəsizlik Xidmətinə 23 il rəhbərlik edən general-polkovnik Rüstəm İnayətov yanvarın 31-də vəzifədən çıxarılıb. Sədr postunu 1995-ci ilin iyunundan tutan Rüstəm İnayətov 1944-cü il təvəllüdlüdür.
İxtiyar Abdullayev 2015-ci ilin aprelindən ölkənin baş prokuroru idi. Yanvarın 31-də baş prokuror postuna Atabek Muradov təyin edilib.
Təyinatlar prezident Şövkət Mirziyayevin sərəncamları ilə gerçəkləşib. Şövkət Mirziyayev 2016-cı il dekabrın 14-dən prezident postunu tutur.
Özbəkistana 1989-cu ildən rəhbərlik edən prezident İslam Kərimov 2016-cı il sentyabrın 2-də dünyasını dəyişib. Onun ölümündən sonra baş nazir Şövkət Mirziyayev dövlət başçısı səlahiyyətlərinə yiyələnib, dekabrın 4-də prezident seçilib.
