Nazirlikdən yeni hesabat
Əmək və Əhalinin Sosial Müdafiəsi Nazirliyi bildirir ki, 2017-ci ildə Dövlət Məşğulluq Xidməti əlilliyi olan 461 nəfəri münasib işlərlə təmin edib. Ödənişli ictimai işlərə cəlb olunan vətəndaşların 45 nəfəri əlilliyi olan şəxslərdir.
Ötən il özünüməşğulluq proqramının icrası çərçivəsində 1172 nəfər işsiz və işaxtaran şəxsə aktivlər (mal və materiallar) verilməklə onların kiçik ailə təsərrüfatları yaradılıb. Onların 60 nəfəri əlilliyi olan şəxsləri təmsil edir.
Rəsmi hesabata görə, son bir ildə nazirliyin xətti ilə əlilliyi olan 432 nəfər şəxs peşə hazırlığına cəlb olunub. Həmin şəxslərin 82 nəfəri üçün əmək bazarında tələb olunan peşələr üzrə peşə hazırlığı və əlavə təhsil kursları təşkil edilib. Digər 350 nəfərin isə Dövlət Sosial Müdafiə Fondunun 1 saylı Sağlamlıq İmkanları Məhdud Gənclərin Peşə Reabilitasiya Mərkəzində peşə hazırlığı həyata keçirilib.
Rəsmi hesabatda xatırladılır ki, 2017-ci ildə Əmək və Əhalinin Sosial Müdafiəsi Nazirliyi 47,9 min nəfər işsiz və işaxtaran vətəndaşı münasib işlərlə təmin edib.
