Naxçıvanın 10 illik göstəriciləri
Naxçıvan Muxtar Respublikasının Dövlət Statistika Komitəsi son 10 ilin müqayisəli göstəricilərini yayıb. Hesabata görə, muxtar respublikada 2007-ci illə müqayisədə 2017-ci ildə ümumi daxili məhsul istehsalı 5 dəfə, sənaye məhsulu 7,9 dəfə, əsas kapitala yönəldilən vəsaitlər 4,5 dəfə, kənd təsərrüfatı məhsulu 3,7 dəfə, nəqliyyat sektorunda yük daşınması 2 dəfə, informasiya və rabitə xidmətləri 3,1 dəfə, pərakəndə əmtəə dövriyyəsi 6,4 dəfə, əhaliyə göstərilən ödənişli xidmətlər 4,7 dəfə artıb.
Naxçıvan Muxtar Respublikasının Dövlət Statistika Komitəsindən AZƏRTAC-a bildirilib ki, 2007-ci ildən 2018-ci il yanvarın 1-dək 46 min 717 yeni iş yeri açılıb. Bunun da 84,7 faizi daimi iş yerləridir. Məşğul əhalinin sayı 2007-ci ilin sonu ilə müqayisədə 1,3 dəfə artaraq 235,5 min nəfərə çatıb.
Bir işçiyə hesablanmış orta aylıq əməkhaqqı göstəricisi 416 manatı ötüb. 2007-ci ildə bu göstərici 153,9 manat səviyyəsində olub.
2017-ci ildə muxtar respublikanın pərakəndə ticarət şəbəkəsində satılmış məhsulların dəyəri 2007-ci illə müqayisədə 6,3 dəfə artaraq 1 milyard 596 milyon manatı ötüb.
