Mənzillərin açarları jurnalistlərə təqdim olunub
Bakının Bibiheybət qəsəbəsindəki ikinci jurnalist evindən mənzil almış şəxslərə sənədlər və açarlar təqdim olunub. Mərasim yanvarın 30-u paytaxtdakı Beynəlxalq Mətbuat Mərkəzində keçirilib.
Kütləvi İnformasiya Vasitələrinin İnkişafına Dövlət Dəstəyi Fondunun inşa etdiyi binanın açılışı ötən ilin iyul ayında olub. Bina bu günlərdə istismara verilib.
Yeni binada 255 mənzil var.
Novator.az-ın məlumatına görə, 30 yanvar tədbirində açarları və sənədləri jurnalistlərə prezidentin ictimai-siyasi məsələlər üzrə köməkçisi Əli Həsənov, Milli Teleradio Şurasının sədri Nuşirəvan Məhərrəmli, Mətbuat Şurasının sədri Əflatun Amaşov təqdim ediblər.
Mərasimdə çıxış edən KİV-in İnkişafına Dövlət Dəstəyi Fondunun icraçı direktoru Vüqar Səfərli deyib ki, artıq binada yaşamaq mümkündür, işıq, su, qaz var, heç bir kommunal problem qalmayıb.
156 mənzilli ilk bina 2013-cü ildə media işçilərinə təqdim olunub.
Hər iki yaşayış binası prezident İlham Əliyevin sərəncamları ilə dövlət vəsaiti hesabına inşa edilib. Mənzillər jurnalistlərə pulsuz verilir.
Dövlət başçısının ötən il iyulun 19-da imzaladığı sərəncama əsasən Bibiheybət qəsəbəsində jurnalistlər üçün daha bir yaşayış binası tikilir.
