Dövlət komitəsi elektron xidmətdən hesabatı verib
Əmlak Məsələləri Dövlət Komitəsinin hesabatına görə, ötən il elektron və onlayn xidmətlər vasitəsilə 180 mindən çox müraciət cavablandırılıb: “Ümumilikdə isə vətəndaşlara, fiziki və hüquqi şəxslərə müxtəlif fəaliyyət istiqamətləri üzrə 650 minə yaxın elektron xidmət göstərilib.
Ötən il ərzində daşınmaz əmlakın qeydiyyatı üzrə elektron xidmətdən istifadə sayı 26 minə yaxın olub. Ümumilikdə bu rəqəm 130 minə yaxındır.
Komitənin www.e-gov.az portalında ən çox istifadə olunan elektron xidməti ipoteka əməliyyatlarının dövlət qeydiyyatı və ləğvi ilə bağlıdır. Bu xidmətlərdən istifadə sayı ötən il ərzində 25 min, bütövlükdə 110 minə yaxındır.
2017-ci il ərzində komitənin göstərdiyi elektron xidmətlərdən istifadənin 150 mini daşınmaz əmlakın yüklülüyünə dair arayışların alınmasına aiddir.
Dövlət əmlakının özəlləşdirilməsi, idarə edilməsi və icarəsinə dair elektron xidmətlər üzrə ümumilikdə 18 minə yaxın müraciət qəbul edilib. Bu elektron xidmətlərdən ən çox istifadə ediləni dövlət əmlakının qorunub saxlanmasına dair illik xüsusi hesabat formasının elektron qəbuludur.
Komitə ötən il 5 yeni elektron xidməti vətəndaşların istifadəsinə verib”.
