“Elektron hökumət” portalı üzrə yeni hesabat
Nəqliyyat, Rabitə və Yüksək Texnologiyalar Nazirliyinin Məlumat Hesablama Mərkəzinin operatoru olduğu “Elektron hökumət” portalında elektron xidmətlərə müraciət edənlərin sayı 40 milyon nəfəri keçib.
Statistikaya əsasən, 2017-ci ildə portalın təqdim etdiyi xidmətlərə müraciət sayı 40 milyon 625 min 499 təşkil edib. Ötən il portalda qeydiyyatdan keçmiş istifadəçilərin sayı 200 minə yaxın olub. Ümumilikdə qeydiyyatdan keçmiş istifadəçilərin sayı 700 minə yaxındır.
2017-ci il ərzində “Elektron hökumət” portalına 41 yeni elektron xidmət inteqrasiya edilib, e-xidmətlərin sayı ümumilikdə 442-ə çatdırılıb.
Nazirlikdən AZƏRTAC-a bildirilib ki, xidmətlərinə ən çox müraciət olunan qurumlar Əmək və Əhalinin Sosial Müdafiəsi Nazirliyi (9 milyon 341 min 135 müraciət), Nəqliyyat, Rabitə və Yüksək Texnologiyalar Nazirliyi (8 milyon 327 min 251), Dövlət İmtahan Mərkəzi (3 milyon 173 min 948), Dövlət Gömrük Komitəsi (961 min 392), “Azərsu” ASC (347 min 243), Əmlak Məsələləri Dövlət Komitəsi (103 min 965), Daxili İşlər Nazirliyi (96 min 568), Ədliyyə Nazirliyi (58 min 253), Mənzil İnşaatı Dövlət Agentliyi (54 min 417) və Dövlət Miqrasiya Xidmətidir (52 min 53).
