Ədliyyə Nazirliyində icra hesabatı
Ədliyyə Nazirliyində 2017-ci ildə məhkəmə və digər orqanların qərarlarının icrası sahəsində görülmüş işlərin müzakirəsinə həsr olunmuş müşavirə keçirilib. Yanvarın 22-də yayılan rəsmi məlumata görə, İcra Baş İdarəsinin rəisi Nurəddin Mustafayev hesabat məruzəsində deyib ki, 2017-ci ildə icrası təmin edilən işlərin sayı 60 faizə çataraq 415 mini ötüb, fiziki, hüquqi şəxslərə və dövlət büdcəsinə, o cümlədən vergi borcları ilə bağlı 562 milyon manatdan çox vəsait ödətdirilib: “Hesabat dövründə aliment işləri üzrə təqribən 125 milyon manatın tələbkarlara ödənilməsi təmin edilib. İcra sənədlərinin icrasından qərəzli boyun qaçıran, icra məmurlarının qanuni tələblərini yerinə yetirməyən 4245 nəfər inzibati məsuliyyətə cəlb edilib, o cümlədən 2878 şəxs inzibati qaydada həbs olunub, 391 şəxs barəsində cinayət işi başlanıb.
Həmçinin 14 mindən artıq borclunun ölkədən getmək hüququ müvəqqəti məhdudlaşdırılıb, 3410 nəfərin məhdudiyyəti isə məhkəmə qərarını icra etdiklərinə görə götürülüb. Ötən il icra işləri ilə bağlı şikayət edən vətəndaşların sayı 30 faizədək, bilavasitə qəbula gələn şəxslərin sayı isə 2 dəfədən çox azalıb”.
Müşavirədə nöqsan və çatışmazlıqlar qeyd olunub, bildirilib ki, 2017-ci ildə fəaliyyətində yol verdikləri ciddi qanun pozuntularına görə xidmətin 31 əməkdaşı intizam məsuliyyətinə cəlb olunub, o cümlədən 5 nəfərin ədliyyə orqanlarında qulluğuna xitam verilib, 10 nəfər isə tutduğu vəzifədən azad edilib.
