Rəsmi Bakı Türkiyənin hərbi əməliyyatlarını dəstəklədi
Azərbaycanın Xarici İşlər Nazirliyi Türkiyə Silahlı Qüvvələrinin Suriya sərhədində apardığı hərbi əməliyyatlara münasibət bildirib.
Yanvarın 20-də Türkiyə Silahlı Qüvvələri Suriyanın şimal-qərbində yerləşən Afrin bölgəsində PKK terror təşkilatı, onun müxtəlif qolları və İŞİD-ə qarşı əməliyyata başlayıb. “Zeytun budağı” adlanan əməliyyatın məqsədi Türkiyə-Suriya sərhədi boyu 30 kilometrlik təhlükəsizlik zolağı yaratmaqdır. Yanvarın 20-də Türkiyə təyyarələri bölgədə terror təşkilatının hədəflərinə zərbələr endirib. Yanvarın 21-də isə Türkiyə ordusu Afrin bölgəsində quru əməliyyatına başlayıb.
KİV-in sorğusunu cavablandıran Xarici İşlər Nazirliyinin mətbuat xidmətinin rəhbəri Hikmət Hacıyev deyib ki, Azərbaycan terrorizmin bütün forma və təzahürlərini qəti şəkildə pisləyir və terrorizmə qarşı mübarizədə beynəlxalq ictimaiyyətin səylərini dəstəkləyir: “Beynəlxalq və regional sülh və təhlükəsizliyin təmin edilməsi üçün terror təhlükəsinin kökünün kəsilməsi xüsusilə vacibdir. Türkiyə hökumətinin bəyan etdiyi kimi, “Zeytun budağı” əməliyyatının məqsədi Türkiyənin sərhədlərinin təhlükəsizliyini təmin etmək, bölgədəki terror təhlükəsini zərərsizləşdirmək və ərazidə yaşayan mülki insanları terror hücumları və təhdidlərindən qorunmaq məqsədi daşıyır.
Türkiyə dəfələrlə terror hücumlarına məruz qalıb və nəticədə çoxsaylı günahsız insanlar həlak olub. Azərbaycan Türkiyənin terror təhdidinə qarşı əsaslı təhlükəsizlik narahatlıqlarını tam şəkildə anlayır. Biz qardaş Türkiyə və Türkiyə xalqının bir daha heç zaman xain terror hücumlarına məruz qalmamasını arzu edirik”.
