“İş yerinə dair arayış”a müraciətlər 815 mini ötüb
Əmək və Əhalinin Sosial Müdafiəsi Nazirliyi bildirir ki, “Elektron hökumət” portalında təqdim olunan “İş yerinə dair arayış” xidmətindən 2017-ci ildə əvvəlki illə müqayisədə 48,3 faiz çox, 337 min 749 dəfə istifadə edilib.
Hesabata görə, 2017-ci ilin dekabr ayında xidmətə müraciətlərin sayı noyabr ayına nisbətən 16,7 faiz, 2016-cı ilin dekabr ayına nisbətən isə iki dəfəyə qədər artaraq 41 min 382-yə çatıb.
Əmək fəaliyyəti ilə məşğul olan hər bir şəxsə istənilən vaxt onlayn rejimdə öz iş yeri barədə arayış əldə etməyə imkan verən “İş yerinə dair arayış” e-xidməti 3 ildən çoxdur fəaliyyət göstərir və ötən müddətdə “Elektron hökumət” portalının e-arayışlar bölməsində ən çox istifadə edilən e-xidmətlər sırasında olub. İndiyədək “İş yerinə dair arayış” e-xidmətinə 815 mindən çox müraciət qeydə alınıb, bu da portaldakı 18 növdə e-arayış xidmətləri üzrə edilən ümumi müraciətlərin təqribən yarıya qədəri deməkdir.
