Trampın bir ilinə iki baxış
Donald Trampın prezidentliyinin ilk ilinə nə qiymət vermək olar?
Novator.az-ın sualını cavablandıran Böyük Quruluş Partiyasının başqanı, deputat Fazil Mustafa deyib ki, Trampın fəaliyyətinə Amerika xalqı qiymət verməlidir: “ABŞ əhli üçün faydalı prezidentdirsə, nə deyə bilərik? Azərbaycandan baxası olsaq, hələ ki, ölkəmizə qarşı zərərli bir iş görməyib, buna görə də fəaliyyətinə baxışım müsbətdir”.
REAL Hərəkatının İdarə Heyətinin üzvü Azər Qasımlı Trampın ABŞ tarixində öz yeri olacağını düşünür: “Bu yer müsbət də ola bilər, mənfi də. Prezidentin fəaliyyətinə Amerika xalqının nə qiymət verdiyini gələcək seçkilərdə biləcəyik. Tramp dünyada demokratiyanın və insan haqlarının müdafiəsi baxımından çox iş görə bilərdi. Lakin bunu hələ ki, görmürük”.
1946-cı ildə Nyu-York ştatında doğulan Donald Tramp 1968-ci ildə Pensilvaniya Universitetinin Uorton Biznes Məktəbini bitirib, bütün karyerasını tikinti biznesinə həsr edib. 1999-cu ildən Respublikaçılar Partiyasının üzvüdür.
2016-cı il noyabrın 8-də keçirilmiş ümumxalq seçkisində Donald Tramp Demokratlar Partiyasından Hillari Klintonu məğlub edib. O, 538 nəfərlik Seçicilər Kollegiyasına 306, Hillari Klinton isə 232 nümayəndə qazanıb. Seçicilər Kollegiyasında səsvermədə 304 nəfər Donald Trampı, 227 nəfər Hillari Klintonu dəstəkləyib. Səsvermənin nəticəsi Konqresdə təsdiqləndikdən sonra 2017-ci il yanvarın 20-də Donald Tramp and içərək səlahiyyətlərinin icrasına başlayıb.
