Ölümü bir il qabaqcadan görən sistem hazırlanıb
ABŞ-ın Stenford Universitetinin alimləri yeni süni intellekt hazırlayıblar. Novator.az-ın məlumatına görə, yeni sistem xəstənin ölümünü bir il qabaqdan xəbər verməyə imkan yaradır. Sistem bu işi 90 faiz dəqiqliklə görür.
Yeni süni intellektin hazırlanması prosesində bir neçə iri xəstəxanada müalicə alan 2 milyon adamın (həm uşaqların, həm də böyüklərin) səhhəti və ölümü araşdırılıb. Neyron şəbəkələrini dərindən tədqiq edən alimlər yekunda ölümü bir il qabaqcadan, 90 faiz dəqiqliklə deməyə imkan yaradan alqoritm müəyyənləşdiriblər.
İnsanların çoxu ömrünün sonunu xəstəxanada deyil, evdə keçirmək istəyir. Stenford Universitetində hazırlanmış yeni süni intellekt ölümü yaxınlaşan adamların bunu daha tez bilməsinə və təkcə son günlərini deyil, son aylarını da evdə keçirməsinə yardımçı olacaq. Bu sistem həkimlərə imkan yaradacaq ki, ölümü yaxınlaşan adamları xəstəxanadan evə daha tez buraxmağa qərar versinlər.
Səidə Hüseynova
