Hakim partiya maliyyə hesabatı açıqladı
Yanvarın 19-da hakim Yeni Azərbaycan Partiyası İdarə Heyətinin iclası keçirilib. Rəsmi məlumata görə, iclasda bildirilib ki, ötən il YAP-a 24 min nəfərdən çox yeni üzv qəbul edilib və partiya üzvlərinin sayı 710 min 186 nəfərə çatıb.
İdarə Heyətinin iclasında YAP-ın ötən ilə dair gəlirləri və xərcləri barədə hesabat verilib. 2017-ci ildə Yeni Azərbaycan Partiyasının gəlirləri 8 milyon 315 min 436 manat olub. Bunun 7 milyon 173 min 280 manatını üzvlük haqları, 1 milyon 142 min 156 manatını büdcədən siyasi partiyalara ayrılan dövlət dəstəyindən düşən pay təşkil edib.
Novator.az bildirir ki, hesabata görə, Yeni Azərbaycan Partiyasının cəmi xərcləri 10 milyon 500 min 531 manat olub, cari hesablarda və ehtiyat hesabında 6 milyon 446 min 14 manat qalıb.
1992-ci ildə Heydər Əliyevin yaratdığı YAP-a hazırda prezident İlham Əliyev sədrlik edir.
