Beynəlxalq insan haqları hesabatı yayılıb
“Human Rights Watch” beynəlxalq insan hüquqları təşkilatı 2017-ci il üzrə hesabat açıqlayıb. Hesabatda 90-dan çox ölkə və ərazidə insan haqlarının 2017-ci ildəki vəziyyəti təhlil edilir.
Novator.az-ın məlumatına görə, hesabatın bir fəsli Azərbaycana həsr olunub. Qeyd edilir ki, ötən il Azərbaycanda hökumət müxalif qüvvələrə qarşı basqını gücləndirib, onlarca jurnalist, siyasətçi və gənc fəal siyasi motivlərlə cinayət məsuliyyətinə cəlb edilib, ədalətsiz məhkəmə hökmləri ilə uzunmüddətli həbs cəzasına məhkum olunub: “Hökumət əleyhinə narazılıq ifadə edən belə şəxslər eyni zamanda incidilib, onların ölkədən çıxışlarına qadağa tətbiq edilib, bəziləri isə ölkəni tərk edərək canını qurtara bilib”.
Hesabata görə, ötən il Azərbaycanda 18 fəal siyasi motivli cinayət məsuliyyətinə cəlb edilib və həbs olunub, 7 jurnalist və bloqçuya eyni qaydada cinayət işi açılıb.
Sənəddə xatırladılır ki, Avropa Şurası həbsdə olan REAL Hərəkatının lideri İlqar Məmmədovun azadlığa buraxılması üçün Azərbaycan hökumətinə 11 dəfə çağırış edib.
Qeyd olunur ki, ölkənin 5 media qurumunun saytı milli təhlükəsizliyi qorumaq bəhanəsi ilə bloklanıb, 11 jurnalist və qeyri-hökumət təşkilatı liderinə ölkəni tərk etmək qadağası tətbiq edilib.
Hesabatda tutulan və basqıya məruz qalan şəxslər sırasında Vidadi İsgəndərli, Mehman Hüseynov, Əfqan Muxtarlı, Əziz Orucov və digərləri barədə məlumatlar əksini tapıb.
O da vurğulanır ki, ötən il məhkəmə çəkişmələrində nümayəndəlik institutu məhdudlaşdırılıb, qeyri-vəkillərin məhkəmələrdə təmsilçilik hüquqlarına son qoyulub.
