İsa Qəmbər açıqlama yayıb
Yanvarın 18-də Bakıdakı Mərkəzi Klinik Xəstəxanadan evə buraxılan İsa Qəmbər Facebook şəbəkəsindəki səhifəsində açıqlama yerləşdirib.
Novator.az-ın məlumatına görə, İsa Qəmbər açıqlamasına xəstəxanada ona xidmət göstərmiş tibbi heyətlə və xanımı Aida Qəmbərlə birgə çəkdirdiyi fotoşəkli də əlavə edib.
İsa Qəmbər yazıb: “Mərkəzi Klinikadan ayrıldıq. Firdovsi həkim başda olmaqla peşəkar, qayğıkeş həkim heyəti və bütün personala təşəkkürlər!”
İsa Qəmbər Mərkəzi Klinik Xəstəxanada yanvarın 13-dən müalicə olunurdu. Yanvarın 16-dək reanimasiya şöbəsində, həmin gündən isə palatada onun ürək-damar sisteminin fəaliyyətini gücləndirmək istiqamətində tibbi prosedurlar aparılıb.
Hazırda İsa Qəmbər müalicəsini evdə davam etdirir.
60 yaşlı İsa Qəmbər Azərbaycan Xalq Cəbhəsinin qurucularından, milli azadlıq hərəkatının liderlərindən biridir. 1992-1993-cü illərdə Milli Məclisin sədri olub, 1992-ci il mayın 18-dən iyunun 17-dək prezident səlahiyyətlərini icra edib.
1992-2014-cü illərdə Müsavat Partiyasının başqanı postunu tutmuş İsa Qəmbər bu təşkilatın prezidentliyə namizədidir, Milli Strateji Düşüncə Mərkəzinə sədrlik edir.
