İqtisadiyyat 2011-ci ilin göstəricisini təkrarlayıb
2017-ci ildə Azərbaycanda 70 milyard 135,1 milyon manatlıq və ya əvvəlki illə müqayisədə 0,2 faiz çox ümumi daxili məhsul istehsal edilib. Novator.az-ın məlumatına görə, Dövlət Statistika Komitəsi bildirir ki, iqtisadiyyatın qeyri-neft sektorunda əlavə dəyər 2,7 faiz artıb, neft sektorunda isə 5 faiz azalıb.
Qeyri-neft sektorunun ÜDM-də xüsusi çəkisi 62,8 faiz təşkil edib.
Əlavə dəyərin 40,1 faizi sənayedə, 10,4 faizi ticarət; nəqliyyat vasitələrinin təmiri, 9,5 faizi tikinti, 6,8 faizi nəqliyyat və anbar təsərrüfatı, 5,6 faizi kənd təsərrüfatı, meşə təsərrüfatı və balıqçılıq, 2,3 faizi turistlərin yerləşdirilməsi və ictimai iaşə, 1,6 faizi informasiya və rabitə, 16,4 faizi digər sahələrdə istehsal olunub.
Məhsula və idxala xalis vergilər ÜDM-in 7,3 faizini təşkil edib.
Əhalinin hər nəfərinə düşən ÜDM 7205 manata bərabər olub.
Novator.az xatırladır ki, 2016-cı ildə əvvəlki ildən 3,1 faiz az ümumi daxili məhsul istehsal olunmuşdu. 2015-ci ildə ümumi daxili məhsulun həcmi əvvəlki illə müqayisədə 1,1 faiz çoxalmış, 2014-cü ildə 2,8 faiz, 2013-cü ildə 5,8 faiz, 2012-ci ildə 2,2 faiz, 2011-ci ildə 0,1 faiz artım qeydə alınmışdı.
Başqa bir hesabata əsasən, 2016-cı illə müqayisədə kənd təsərrüfatının ümumi məhsulu 4,2 faiz, o cümlədən heyvandarlıq məhsullarının istehsalı 2,7 faiz, bitkiçilik məhsullarının istehsalı 6,1 faiz artıb.
Nəqliyyat sektoruna gəlincə, 2016-cı illə müqayisədə yük daşınması 1,8 faiz, sərnişin daşınması isə 2,3 faiz artıb.
2016-cı illə müqayisədə 2017-ci ildə göstərilmiş informasiya və rabitə xidmətlərinin həcmi dəyər ifadəsində 6,6 faiz artıb.
Dövlət Statistika Komitəsi onu da qeyd edir ki, 2016-cı illə müqayisədə 2017-ci ildə əhalinin gəlirləri nominal ifadədə 8,3 faiz artaraq 49 milyard 162,9 milyon manata çatıb.
