Demoqrafiya hesabatında nələr var?
Dövlət Statistika Komitəsi demoqrafik vəziyyətə dair yeni hesabat yayıb. Novator.az-ın məlumatına görə, rəsmi açıqlamada qeyd olunur ki, Azərbaycan əhalisinin sayı 2017-ci il dekabr ayının 1-nə 9 milyon 890 min 712 nəfərə çatıb. Əhalinin 49,9 faizi kişi, 50,1 faizi qadındır, hər 1000 kişiyə 1006 qadın düşür.
Ədliyyə Nazirliyinin qeydiyyat şöbələri ötən ilin yanvar-noyabr aylarında 132 min 2 doğulan körpə qeydə alıb. Doğulanların 53,1 faizi oğlan, 46,9 faizi qızdır.
Ötən ilin yanvar-noyabr aylarında ölkədə 52318 ölüm halı rəsmiləşib, 57177 nikah və 13345 boşanma qeydə alınıb.
Daxili İşlər Nazirliyi və Dövlət Miqrasiya Xidmətinin müvafiq qurumları daimi yaşamaq üçün 2751 nəfər gələn, 1704 nəfər gedən qeydə alıb, miqrasiya saldosu müsbət 1047 nəfər təşkil edib.
