Davosa kimlər toplaşır
Yanvarın 23-26-da İsveçrənin Davos şəhərində keçiriləcək Dünya İqtisadi Forumuna 70 ölkənin dövlət başçısı və baş naziri gedəcək. AZƏRTAC xəbər verir ki, “Parçalanan dünyada birgə gələcək yaratmaq” mövzusuna həsr edilən foruma 340 yüksək səviyyəli şəxs qatılacaq, 110 ölkədən təxminən 3 min iştirakçı müxtəlif mövzular üzrə müzakirələr aparacaq.
Forumda açılışı Hindistanın baş naziri Narendra Modi, yekun çıxışı ABŞ prezidenti Donald Tramp edəcək.
Təhlükəsizlik üçün təxminən 10 milyon dollar sərf olunacaq.
Yığıncağa dövlət başçıları ilə yanaşı BMT-nin baş katibi, Dünya Ticarət Təşkilatının baş direktoru, Avropa Komissiyasının prezidenti, Beynəlxalq Valyuta Fondunun baş direktoru, Dünya Bankının rəhbəri, Beynəlxalq Enerji Agentliyinin icra direktoru, BMT-nin qaçqınlar üzrə ali komissarı, Beynəlxalq Miqrasiya Təşkilatının baş direktoru və Beynəlxalq Əmək Təşkilatının baş direktoru qatılacaq.
Yanvarın 23-də Azərbaycan prezidenti İlham Əliyevin “Strateji perspektivlər: Avrasiya” panelindəki müzakirələrdə çıxış edəcəyi gözlənir.
