Korrupsiyaya qarşı mübarizə: ilin hesabatı verilib
Yanvarın 17-də Baş Prokuror yanında Korrupsiyaya Qarşı Mübarizə Baş İdarəsinin rəisi Kamran Əliyev mətbuat konfransı keçirib.
Novator.az-ın məlumatına görə, Kamran Əliyev 2017-ci ildə görülən işlərdən danışıb. O bildirib ki, ötən il idarədə cinayət xarakterli 280 material araşdırılıb. Materiallardan 181-i üzrə cinayət işi başlanıb, 99-u üzrə digər prokuror təsir aktları tətbiq edilib.
2017-ci ildə Korrupsiyaya Qarşı Mübarizə Baş İdarəsinin 161 saylı “Qaynar xətt”inə 4 min 183 müraciət daxil olub. Həmin müraciətlər əsasında 23 cinayət işinə başlanıb.
İl ərzində idarədə dövlət və özəl sektorda çalışan 305 vəzifəli şəxs barəsində 214 cinayət işinin istintaqı tamamlanaraq baxılması üçün məhkəmələrə göndərilib.
Həmin 305 adamdan 127-si qulluq mövqeyindən istifadə etməklə mənimsəmədə və israf etmədə, 67-si qulluq mövqeyindən istifadə etməklə dələduzluqda, 35-i vəzifə səlahiyyətlərindən sui-istifadədə, 17-si rüşvət almada (passiv rüşvətxorluq), 19-u rüşvət vermədə (aktiv rüşvətxorluq), 8-i vəzifə saxtakarlığında, qalanları isə digər korrupsiya cinayətlərində ittiham edilib.
Məhkəmələrə göndərilən cinayət işləri üzrə 83 milyon 486 min manat ziyanın ibtidai araşdırma mərhələsində 27 milyon 575 min manatı ödənilib. Qalan ziyanın ödənilməsini təmin etmək məqsədilə 15 milyon 381 min manat məbləğində əmlak üzərinə həbs qoyulması ilə yanaşı, qanunla nəzərdə tutulan digər tədbirlər görülüb.
Tədbirdə o da bildirilib ki, “Elektron hökumət” portalına inteqrasiya olunan qurumların sayı 91, elektron xidmətlərin sayı isə 437-ə çatıb. O cümlədən “ASAN xidmət” mərkəzlərinin sayı 12-yə çatdırılıb və bu günə qədər “ASAN xidmət” mərkəzlərinə 20 milyona yaxın müraciət daxil olub.
