Hansı ölkələr İsraili tanımır?
2018-ci ildə İsrail Dövlətinin yaradılmasının 70 ili tamam olur, amma hələ də onu tanımayan ölkələr var.
Novator.az bildirir ki, 1947-ci ildə BMT Fələstin torpaqlarının bölünməsinə qərar verib. Həmin qərar ərazidə İsrail və Fələstin dövlətlərinin qurulmasını, Yerusəlimin (Qüds) beynəlxalq nəzarətə verilməsini nəzərdə tutub.
1948-ci il may ayının 14-də İsrail müstəqil dövlət elan olunub, ardınca Yerusəlimi paytaxt seçib.
Əvvəl-əvvəl BMT-nin Fələstinə ayırdığı ərazilərin yarıya qədərini tutan İsrail 1967-ci ildə Qüdsün şərq hissəsini, eyni zamanda İordan çayının qərb sahilini işğal edib.
1988-ci ildə Fələstin müstəqil dövlət elan olunub. 2012-ci ildə BMT Fələstinə ərazisi işğal olunmuş müstəqil dövlət statusu verib. Bu o deməkdir ki, İsrail 1967-ci ildə tutduğu Şərqi Qüdsdən və İordan çayının qərb sahilindən çıxmalıdır.
Son statistikaya görə, BMT-yə üzv 192 ölkənin 161-i İsrailin müstəqilliyini tanıyır.
31 ölkə isə İsraili dövlət kimi tanımaqdan imtina edir: Banqladeş, Bəhreyn, Birləşmiş Ərəb Əmirlikləri, Bruney, Butan, Cibuti, Çad, Əfqanıstan, Əlcəzair, İndoneziya, İraq, İran, Komor adaları, Kuba, Küveyt, Qətər, Livan, Liviya, Malayziya, Mali, Mərakeş, Niger, Oman, Pakistan, Səudiyyə Ərəbistanı, Somali, Sudan, Suriya, Şimali Koreya, Tunis, Yəmən.
Novator.az xatırladır ki, Azərbaycan İsraili bir dövlət kimi tanıyır. İki ölkə arasında diplomatik münasibətlər 1992-ci il aprelin 6-da qurulub. İsrailin Azərbaycanda səfirliyi olsa da, Azərbaycanın İsraildə səfirliyi yoxdur.
