Brüssel toplantıları
Müdafiə nazirinin birinci müavini, Silahlı Qüvvələrin Baş Qərargah rəisi general-polkovnik Nəcməddin Sadıqov yanvarın 16-sı Brüsseldə, NATO Hərbi Komitəsinin “Qətiyyətli dəstək” və “Sabitliyin layihələşdirilməsi” formatlı görüşlərində iştirak edib. Xəbəri Mod.gov.az yayıb.
“Qətiyyətli dəstək” formatlı görüşdə baş qərargah rəisləri Əfqanıstandakı təhlükəsizlik şəraiti, NATO-nun Qətiyyətli Dəstək Missiyasının gedişatı və əməliyyat şəraitindəki dəyişikliklər, o cümlədən Cənub-Şərqi Asiyadakı vəziyyətə dair müzakirələr aparıblar.
“Sabitliyin layihələşdirilməsi” formatlı görüşdə isə Avropanın cənub qonşuluğunda təhlükəsizlik və stabilliyə hərbi töhfə məsələləri, eləcə də bu töhfələr üzrə NATO, Avropa İttifaqı, regional təhlükəsizlik təminatçıları və milli səylər arasında əməkdaşlıq məsələləri müzakirə edilib.
Nəcməddin Sadıqov 1956-cı ildə Dərbənd şəhərində doğulub. Bakıda Ali Ümumqoşun Komandirlər Məktəbini və Moskvada Frunze adına Hərbi Akademiyanı bitirib.
1979-1992-ci illərdə SSRİ Silahlı Qüvvələri tərkibində vzvod, rota, batalyon komandiri və polk komandirinin müavini vəzifələrində xidmət edib.
1992-ci ildən Azərbaycan Silahlı Qüvvələrində briqada komandiri, korpus komandiri, cəbhə komandanının birinci müavini-Səhra İdarəetmə Qərargahının rəisi vəzifələrini tutub.
1993-cü il noyabrın 2-dən Silahlı Qüvvələrin Baş Qərargah rəisi-müdafiə nazirinin birinci müavinidir.
