Əli İnsanovun şikayəti təmin edilmədi
Yanvarın 16-sı keçmiş səhiyyə naziri Əli İnsanovun kassasiya şikayətinə baxılması prosesi başa çatıb.
Şikayət təmin edilməyib. Hakim Fərhad Kərimovun sədrliyi ilə keçirilən prosesdə apellyasiya instansiyasının hökmü qüvvədə saxlanıb.
Əli İnansovun özü prosesdə iştirak etməyib.
Novator.az bildirir ki, 1946-cı il təvəllüdlü Əli İnsanov səhiyyə naziri postunu 1993-2005-ci illərdə tutub. 2005-ci ilin oktyabr ayında həbs olunan Əli İnsanov iqtisadi cinayətlər ittihamı ilə 11 il müddətinə azadlıqdan məhrum edilib.
2016-cı il avqustun 24-də Əli İnsanova yeni cinayət işi qaldırılıb. İttihama görə, avqustun 23-də 13 saylı Cəzaçəkmə Müəssisəsində rejim qaydalarına baxış tədbirləri keçirilərkən Əli İnsanovda psixotrop maddə hesab edilən həblər, cəzaçəkmə müəssisələrində qadağan olunmuş güclü təsiredici dərman vasitəsi aşkar olunub, Penitensiar Xidmətin əməkdaşları protokol tərtib edərkən Əli İnsanov onlara mane olmağa cəhd göstərərək protokolu cırıb, ədliyyə zabitinə zor tətbiq edib və sağlamlığı üçün təhlükəli xəsarətlər yetirib.
2017-ci il aprelin 26-da Qaradağ Rayon Məhkəməsi Əli İnsanovu 7 il 5 gün müddətinə azadlıqdan məhrum edib və sabiq nazirin həbsi 2023-cü ilədək uzadılıb. Bakı Apellyasiya Məhkəməsi hökmü qüvvədə saxlayıb.
Əli İnsanovun bu hökmdən verdiyi şikayətə Ali Məhkəmədə 2017-ci ilin noyabrından baxılırdı.
Vəkil Toğrul Babayev “Amerikanın səsi”nə deyib ki, sabiq nazir Ali Məhkəmənin qərarından Avropa İnsan Hüquqları Məhkəməsinə şikayət etməyi planlaşdırır.
