İsa Qəmbər necədir?
Yanvarın 13-dən Bakıdakı Mərkəzi Klinik Xəstəxanada müalicə olunan İsa Qəmbər yanvarın 16-da reanimasiya şöbəsindən palataya köçürülüb. Bunu Novator.az-a İsa Qəmbərin xanımı Aida Qəmbər deyib.
Aida Qəmbər bildirib ki, İsa Qəmbərin durumu nəzarət altındadır, həkimlər ürək-damar sisteminin fəaliyyətini gücləndirmək istiqamətində tibbi prosedurları davam etdirirlər.
Onun sözlərinə görə, əvvəllər həyat yoldaşının ürəyində heç bir problem müşahidə etməyib: “İndiyədək İsa bəyin ürəyindən bir dəfə də şikayəti olmayıb. İnsandır, yaşlandıqca müəyyən problemlər ortaya çıxa bilər”.
Xanımı vurğulayıb ki, İsa Qəmbərin xəstəxanaya müraciət etməsinə o təşəbbüs göstərib: “Ayın 13-də halı pisləşəndə evdə idi, işə hazırlaşırdı. Həkimə müraciət etməyi məsləhət bildim, razılaşdı”.
İsa Qəmbərin müalicəsinə hökumətin dəstək təklif etməsi haqda bəzi KİV-lərdə yayılan xəbərlərə gəlincə, xanımı bildirib ki, bu məlumatları yalnız mediada görüb, reallıqda belə bir şey yoxdur.
Həyat yoldaşı İsa Qəmbərin müalicəsinin ölkədə davam etdiriləcəyini, xaricə getməyə lüzum görmədiyini deyib: “Həkimlər çox yaxşıdır, mən onlara etimad göstərirəm. İsa bəyə qayğı ilə yanaşırlar”.
60 yaşlı İsa Qəmbər Azərbaycan Xalq Cəbhəsinin qurucularından, milli azadlıq hərəkatının liderlərindən biridir. 1992-1993-cü illərdə Milli Məclisin sədri olub, 1992-ci il mayın 18-dən iyunun 17-dək prezident səlahiyyətlərini icra edib.
1992-2014-cü illərdə Müsavat Partiyasının başqanı postunu tutmuş İsa Qəmbər bu təşkilatın prezidentliyə namizədidir, Milli Strateji Düşüncə Mərkəzinə sədrlik edir.
