Ermənistanda prezident necə seçiləcək?
Novator.az bu il tam parlament idarə üsuluna keçməsi gözlənən Ermənistanda növbəti prezidentin necə seçiləcəyinə nəzər salıb.
İndiki prezident Serj Sərkisyanın səlahiyyət müddəti 2018-ci ilin yazında başa çatır. Bundan sonra hökuməti parlamentdə səs çoxluğuna sahib partiya quracaq, icra hakimiyyətinə baş nazir rəhbərlik edəcək.
Yalnız dövlət başçısı funksiyası daşıyan prezidenti isə parlament 7 il müddətinə seçməlidir.
Hazırda Ermənistan parlamentinin 105 deputatı var. Hakim Ermənistan Respublika Partiyası 58, Sarukyan bloku 31, “Çıxış” bloku 9, Daşnaksütun Partiyası 7 mandatla təmsil olunur.
Ana qanuna görə, 40 yaşa çatmış, son 6 ildə yalnız Ermənistan vətəndaşı olmuş və həmin dövr ərzində ölkədə daimi yaşamış, erməni dilini bilən şəxs prezident seçilə bilər.
Prezidentliyə namizədi deputatların ən azı dörddə biri (27 deputat) irəli sürür.
Parlament üzvlərinin dörddə üçünün (79 deputat) səsini toplayan şəxs prezident seçilir.
Birinci turda prezidenti seçmək mümkün olmasa, bütün namizədlərin iştirakı ilə ikinci tur keçirilir. Bu zaman prezident seçilmək üçün parlament üzvlərinin beşdə üçünün (63 deputat) səsi gərəkdir.
Prezidenti ikinci turda da seçmək mümkün olmasa, ikinci turda ən çox səs toplamış iki namizədin iştirakı ilə üçüncü tur keçirilir. Üçüncü turda prezident seçilmək üçün deputatların yarıdan çoxunun (53 səs) səsini toplamaq lazımdır.
Bir şəxsin yalnız bir dəfə prezident seçilmək hüququ var. Səlahiyyət müddətində prezidentin partiya üzvü olması qadağandır.
Konstitusiyanı pozmaq, dövlətə xəyanət və başqa ağır cinayətlərə görə prezident vəzifəsindən kənarlaşdırıla bilər. Bu halda parlament Konstitusiya Məhkəməsinin rəyini alandan sonra deputatların ən azı üçdə iki səs çoxluğu ilə (70 səs) qərar çıxarır.
