161 siyasi məhbus 11 qrupa bölünüb
Hüquq müdafiəçiləri Leyla Yunus, Oqtay Gülalıyev, Elşən Həsənovun yaratdığı Siyasi Məhbusları Müdafiə Mərkəzi yeni siyahı yayıb.
Novator.az-ın məlumatına görə, siyahıda 161 nəfərin adı var.
Siyasi məhbuslar 11 qrupa bölünüb. İnanclılar qrupuna 90 nəfərin adı salınıb. 14 nəfər ömürlük məhkumlar qrupunda, 13 nəfər sosial etirazların qurbanları qrupunda, 12 nəfər jurnalist və bloqçular qrupunda yer alır.
Siyasi Məhbusları Müdafiə Mərkəzi 10 nəfəri MTN-də cinayətlərin qurbanları qrupuna daxil edib.
Digər qruplar bunlardır: müxalif partiya və hərəkatların üzvləri (8 nəfər), gənc fəallar (4 nəfər), girovlar (4 nəfər), keçmiş dövlət məmurları (3 nəfər), yazıçı və şairlər (2 nəfər), hüquq müdafiəçiləri (1 nəfər).
Novator.az bildirir ki, siyahıda bu jurnalist və bloqçuların adları var:
– Nicat Əliyev, Azadxeber.net saytının baş redaktoru;
– Araz Quliyev, Xəbər44.com internet qəzetin baş redaktoru;
– Rəşad Ramazanov, bloqçu;
– Seymur Həzi, “Azadlıq” qəzetinin şərhçisi;
– Cavid Şirəliyev, 7gun.az saytının redaktoru;
– Fikrət Fərəməzoğlu, Jam.az portalının baş redaktoru;
– Əfqan Sadıqov, Azel.tv saytının baş redaktoru;
– Elçin İsmayıllı, Kent.info saytının baş redaktoru;
– Mehman Hüseynov, bloqçu;
– Əfqan Muxtarlı, müstəqil jurnalist;
– Əziz Orucov, “Kanal 13” internet televiziyasının direktoru;
– Ziya Əsədli, “Azadlıq” qəzetinin əməkdaşı.
Avropa Şurası 2012-ci ildə siyasi məhbus anlayışının meyarlarını müəyyənləşdirib. Meyarlara görə, azadlıqdan məhrum edilən şəxsə bu hallarda siyasi məhbus kimi baxılmalıdır: saxlanma fikir, vicdan və din azadlığı, fikrin ifadə olunması və informasiya azadlığı, toplaşma və birləşmə azadlığı pozulmaqla həyata keçirilibsə; saxlanma istənilən cinayətlə əlaqəsi olmadan siyasi səbəblərdən həyata keçirilibsə; həbsdə saxlamanın müddəti və ya onun şərtləri şəxsin ittiham olunduğu cinayətə proporsional deyilsə; vətəndaş digər şəxslərlə müqayisədə ayrı-seçkilik əsasında saxlanıbsa və ya saxlama ədalətsiz məhkəmə çəkişməsinin nəticəsidirsə və bu, hakimiyyətin siyasi motivləri ilə bağlıdırsa.
