Siyasi məhbus siyahısına əlavələr olub
Siyasi Məhbusları Müdafiə Mərkəzi siyasi məhbus siyahısını yeniləyib. Novator.az-ın məlumatına görə, bu qurumda hüquq müdafiəçiləri Leyla Yunus, Oqtay Gülalıyev, Elşən Həsənov və başqaları təmsil olunurlar.
Yanvarın 15-də yayılan açıqlamada bildirilir ki, Avropa Şurasının meyarlarına uyğun gəldikləri üçün “Turan TV”nin əməkdaşı Türkel Azərtürkün bacanağı Emin Saqiyev, Müsavat Partiyası Şirvan şəhər təşkilatının sədri Əlikram Xurşidov və keçmiş hicab məhbusu Elşən Abbasov siyasi məhbus siyahısına daxil edilib. Kanadada yaşayan siyasi mühacir Sahib Teymurovun qardaşı Tahir Teymurovun həbsində siyasi motivlərin olduğu ehtimal edildiyindən onunla bağlı məsələ araşdırma altına alınıb.
Avropa Şurası 2012-ci ildə siyasi məhbus anlayışının meyarlarını müəyyənləşdirib. Meyarlara görə, azadlıqdan məhrum edilən şəxsə bu hallarda siyasi məhbus kimi baxılmalıdır: saxlanma fikir, vicdan və din azadlığı, fikrin ifadə olunması və informasiya azadlığı, toplaşma və birləşmə azadlığı pozulmaqla həyata keçirilibsə; saxlanma istənilən cinayətlə əlaqəsi olmadan siyasi səbəblərdən həyata keçirilibsə; həbsdə saxlamanın müddəti və ya onun şərtləri şəxsin ittiham olunduğu cinayətə proporsional deyilsə; vətəndaş digər şəxslərlə müqayisədə ayrı-seçkilik əsasında saxlanıbsa və ya saxlama ədalətsiz məhkəmə çəkişməsinin nəticəsidirsə və bu, hakimiyyətin siyasi motivləri ilə bağlıdırsa.
