İsa Qəmbərin səhhəti ilə əlaqədar açıqlama yayılıb
Yanvarın 15-də Müsavat Partiyasının mətbuat xidməti sabiq başqan İsa Qəmbərin səhhəti ilə əlaqədar açıqlama yayıb.
Açıqlamada bildirilir ki, Bakıdakı Mərkəzi Klinik Xəstəxanada olan İsa Qəmbər cərrahiyyə əməliyyatına məruz qalmayıb: “Hazırda onun ürək-damar sisteminin fəaliyyətinin gücləndirilməsi istiqamətində tibbi prosedurlar həyata keçirilir. İsa Qəmbər özünü yaxşı hiss edir, onun yaxın iki gün ərzində xəstəxanadan çıxacağı bildirilir”.
Partiyanın mətbuat xidməti sabiq başqanın xəstəxanaya ağır vəziyyətdə aparılması və hazırda da səhhətinin pis olması barədə iddiaları təkzib edib.
İsa Qəmbər yanvarın 13-də xəstəxanaya yerləşdirilib.
60 yaşlı İsa Qəmbər Azərbaycan Xalq Cəbhəsinin qurucularından, milli azadlıq hərəkatının liderlərindən biridir. 1990-1995-ci illərdə parlamentin deputatı, 1992-1993-cü illərdə Milli Məclisin sədri olub, 1992-ci il mayın 18-dən iyunun 17-dək prezident səlahiyyətlərini icra edib.
1992-2014-cü illərdə Müsavat Partiyasının başqanı postunu tutmuş İsa Qəmbər bu təşkilatın prezidentliyə namizədidir, Milli Strateji Düşüncə Mərkəzinə sədrlik edir.
