İsa Qəmbərin müalicəsi davam edir
“İsa bəyin səhhəti yaxşıdır, özünü normal hiss edir”. Bunu yanvarın 15-də Novator.az-a açıqlamasında Aida Qəmbər deyib.
Yanvarın 13-də Milli Strateji Düşüncə Mərkəzinin sədri İsa Qəmbərin səhhətində problem yaranıb. Həmin gün Bakıdakı Mərkəzi Klinik Xəstəxanada müayinədən keçən İsa Qəmbər əməliyyat olunub, onun ürəyinə stend qoyulub.
Aida Qəmbər həyat yoldaşının Mərkəzi Klinik Xəstəxanada müalicəsinin davam etdiyini, evə nə vaxt buraxılacağına bu gün qərar veriləcəyini bildirib.
İsa Qəmbər 1957-ci il fevralın 24-də Bakı şəhərində doğulub. Bakı Dövlət Universitetinin tarix fakültəsini bitirib. 1979-1989-cu illərdə Milli Elmlər Akademiyasında elmi işçi vəzifəsində çalışıb. Siyasətə 1980-ci illərin ikinci yarısında qoşulan İsa Qəmbər Azərbaycan Xalq Cəbhəsinin qurucularından, milli azadlıq hərəkatının liderlərindən biridir. 1990-1995-ci illərdə parlamentin deputatı, 1992-1993-cü illərdə Milli Məclisin sədri olub, 1992-ci il mayın 18-dən iyunun 17-dək prezident səlahiyyətlərini icra edib.
1993-cü ilin yayında Əbülfəz Elçibəyin başçılıq etdiyi milli demokratik hakimiyyət hərbi-siyasi qiyamla devriləndən sonra İsa Qəmbər bir müddət həbsdə olub. 1992-2014-cü illərdə Müsavat Partiyasının başqanı postunu tutub.
