Büdcədə 1 milyard 141,4 milyon manat kəsir qalıb
Maliyyə Nazirliyi 2017-ci ilin dövlət büdcəsinin icrasına dair hesabat yayıb. Novator.az-ın məlumatına görə, hesabatda bildirilir ki, dövlət büdcəsinin mədaxili 16 milyard 446,9 milyon manat, xərcləri 17 milyard 588,3 milyon manat olub.
Gəlirlər proqnoza qarşı 98,1 faiz icra edilib. Vergilər Nazirliyi xətti ilə daxilolmalar 6 milyard 972 milyon manat təşkil edib, həmin vəsaitin 74,5 faizi qeyri-neft sektorundan daxilolmaların payına düşüb.
Dövlət Gömrük Komitəsinin xətti ilə büdcəyə 2 milyard 608,8 milyon manat vəsait gəlib.
Dövlət Neft Fondundan büdcəyə 6 milyard 100 milyon manat vəsait transfert edilib.
Ödənişli xidmətlərdən 366,1 milyon manat, Mərkəzi Bankın mənfəətindən ayırmalar hesabına 250 milyon manat, sair daxilolmalardan 150 milyon manat vəsait gəldiyi bildirilir.
2017-ci ildə dövlət büdcəsinin xərcləri 98 faiz icra olunub. Dövlət büdcəsi xərclərinin 62,1 faizi cari xərclərə, 29,3 faizi əsaslı xərclərə, 8,6 faizi dövlət borcuna və öhdəliklərinə xidmətlə bağlı xərclərə yönəldilib.
Hesabata görə, xərclərin 38 faizi sosial təyinatlı xərclərin (əməyin ödənişi fondu, təqaüd və sosial müavinətlər, dərman və ərzaq xərcləri) maliyyələşdirilməsinə yönəldilib.
Dövlət büdcəsinin kəsiri 1 milyard 141,4 milyon manat olub.
Novator.az xatırladır ki, 2018-ci ilin dövlət büdcəsinin (Qanun) gəlirləri 20 milyard 127 milyon manat, xərcləri 21 milyard 47 milyon manat məbləğində təsdiq edilib.
