Vəkilliyə 2 minə yaxın iddiaçı var
Vəkillərin İxtisas Komissiyası bildirir ki, yanvarın 28-də Dövlət İmtahan Mərkəzi ilə birgə vəkilliyə namizədlərlə yazılı test imtahanı keçiriləcək. İmtahanın yeri, o cümlədən buraxılış vərəqələrinin təqdim olunması və s. məsələlərə dair məlumatlar yaxın günlərdə elan ediləcək.
2017-ci il dekabrın 9-da Vəkillər Kollegiyasının Rəyasət Heyətinin qərarı ilə sənəd qəbulu başlayıb. Kollegiyanın tarixində ilk dəfə imtahana hazırlıq proqramı namizədlərin istifadəsinə təqdim edilib. Yanvarın 11-də sənəd qəbulu yekunlaşıb. Namizədlərin sayı 2 minə yaxındır.
Mülki Prosessual, İnzibati Prosessual məcəllələrə və “Vəkillər və vəkillik fəaliyyəti haqqında” qanuna edilmiş dəyişikliklərə əsasən, yanvarın 1-dən qeyri-vəkillərin məhkəmələrdə təmsilçilik hüquqlarına məhdudiyyət qoyulub. Bu yeniliklərin tətbiqi barədə prezident sərəncamında Vəkillər Kollegiyasına vəkillərin sayının artırılması tövsiyə olunub.
Novator.az bildirir ki, hazırda Vəkillər Kollegiyasının 940-a yaxın üzvü var. Bu, orta hesabla ölkədə 10 min nəfərə 1 vəkilin düşməsi deməkdir.
