Nazirlər Kabineti portaldakı dəyişikliyə aydınlıq gətirdi
Nazirlər Kabineti rəsmi portalı Cabmin.gov.az-dakı dəyişikliyə aydınlıq gətirib.
Bir müddətdir saytdan “Kabinetin strukturu” və “Kabinetin tərkibi” bölmələri götürülüb. Əvvəllər Nazirlər Kabinetinin rəsmi saytına daxil olaraq mərkəzi icra hakimiyyəti qurumlarının portallarına keçid eləmək, eləcə də hökumət üzvlərinin (baş nazir, onun müavinləri, nazirlər və s.) siyahısı ilə tanış olmaq mümkün idi.
Yanvarın 12-də Novator.az-ın əməkdaşı Nazirlər Kabinetinin mətbuat xidməti ilə əlaqə saxlayaraq struktur və tərkibə dair bölmələrin rəsmi saytdan niyə götürüldüyünü soruşub. Sorğuya cavabda bildirilib ki, Cabmin.gov.az saytında yenilənmə işləri aparılır: “Yəqin ki, yenilənmə işləri yekunlaşdıqdan sonra bütün bölmələr əvvəlki qaydada fəaliyyət göstərəcək”.
Nazirlər Kabineti prezidentin yuxarı icra orqanıdır. Qurumun əsas səlahiyyətləri dövlət büdcəsinin hazırlanması və icrası, maliyyə-kredit və pul siyasətinin, dövlət iqtisadi və sosial proqramlarının həyata keçirilməsi, nazirliklərə və digər mərkəzi icra hakimiyyəti orqanlarına rəhbərlikdir.
Azərbaycan Konstitusiyasına görə, Nazirlər Kabinetinin tərkibinə baş nazir, onun müavinləri, nazirlər və başqa mərkəzi icra hakimiyyəti orqanlarının rəhbərləri daxildir. Hazırda Nazirlər Kabineti 35 qurumdan (18 nazirlik, 9 dövlət komitəsi, 5 dövlət xidməti, 2 administrasiya, 1 idarə) ibarətdir. Hökumətin 41 üzvü var.
