Merkelin yeni hökuməti qurulur
Almaniyada yeni hökumət razılaşması əldə edilib. Bu, yanvarın 12-də Sosial Demokrat Partiyası hökumət proqramını imzaladıqdan sonra bəlli olub. Xristian Demokrat İttifaqı və Xristian Sosial İttifaqı sənədə daha əvvəl xeyir-dua vermişdi.
Novator.az-ın məlumatına görə, kansler Angela Merkelin Xristian Demokrat və Xristian Sosial ittifaqlarından ibarət alyansı ötən il sentyabrın 24-də keçirilmiş parlament seçkisində Bundestaqa 246 mandat qazanıb. Avropa Parlamentinin sabiq sədri Martin Şultsun rəhbərlik etdiyi Sosial Demokrat Partiyası 153 mandatla ikinci yeri tutub.
Almaniya Üçün Alternativ Partiyasına 94 mandat, Azad Demokrat Partiyasına 80 mandat, Sol Partiyaya 69 mandat, Yaşıllar Partiyasına 67 mandat düşüb.
63 yaşlı Angela Merkel 2000-ci ildən Xristian Demokrat İttifaqının sədridir. 1991-1994-cü illərdə qadınlar və gənclər naziri, 1994-1998-ci illərdə ətraf mühit və təbiətin mühafizəsi naziri postlarını tutub, 2005-ci ildən Almaniya kansleridir.
