Rəsmi Bakı təəccüblənir və etiraz edir
ABŞ Dövlət Departamenti Azərbaycanı terror riski olan ölkələr kateqoriyasına daxil edib. Novator.az-ın məlumatına görə, qeyd olunub ki, terrorçu qruplar Azərbaycanda mümkün terror aktları barədə düşünürlər: “Terrorçular turizm məkanlarını, nəqliyyat qovşaqlarını, bazarları, ticarət mərkəzlərini, yerli özünüidarəetmə obyektlərini, mehmanxanaları, klubları, restoranları, mədəniyyət obyektlərini, parkları, iri idman yarışlarını, təhsil müəssisələrini, aeroportları və digər ictimai yerləri hədəfə ala bilər”.
Xarici İşlər Nazirliyinin mətbuat xidmətinin rəhbəri Hikmət Hacıyev bu məsələyə münasibət bildirərək deyib ki, Azərbaycan terrorizmin bütün forma və təzahürlərini kəskin şəkildə qınayır və pisləyir: “Son illərdə Azərbaycana turist axınının 24 faiz artdığı, ölkəmizə gələn əcnəbi vətəndaşların sayının 2,7 milyon nəfəri ötdüyü, Azərbaycanın I Avropa Oyunları, IV İslam Həmrəyliyi Oyunları, Formula-1 yarışları, mədəniyyətlər və dinlərarası dialoq forumları, digər yüksək səviyyəli siyasi, iqtisadi, idman və mədəniyyət xarakterli mötəbər tədbirlərə, o cümlədən ABŞ və Rusiya Baş Qərargah rəislərinin, NATO hərbi komitəsinin rəhbərinin və Rusiya Baş Qərargah rəisinin görüşləri kimi tədbirlərə ev sahibi etdiyi halda ABŞ Dövlət Departamentinin belə bir açıqlaması çox təəccüblüdür.
Azərbaycanın sözügedən mötəbər tədbirlərə ev sahibliyi etməsi digər amillərlə bərabər ölkəmizdə olan sabitlik, təhlükəsizlik və ictimai asayişin yüksək səviyyədə təmin olunması ilə bağlıdır. Azərbaycan hökuməti Ermənistan silahlı qüvvələrinin işğal etdiyi ərazilər istisna olmaqla ölkədəki təhlükəsizlik və operativ vəziyyəti tam nəzarətdə saxlayır. Azərbaycanın ərazilərinin işğalının davam etməsi regional sülh və təhlükəsizlik üçün başlıca təhdid olaraq qalır”.
