Orta əməkhaqqı nə qədərdir?
Dövlət Statistika Komitəsi muzdla işləyən şəxslərin sayı və orta əməkhaqqı barədə hesabat yayıb. Novator.az bildirir ki, hesabata görə, ötən il dekabrın 1-nə ölkə iqtisadiyyatında muzdla çalışan işçilərin sayı 1 milyon 521,2 min nəfər olub. Onların 881,1 min nəfəri iqtisadiyyatın dövlət sektorunda, 640,1 min nəfəri qeyri-dövlət sektorunda işləyib.
Muzdla işləyənlərin 21,8 faizi təhsil, 19,1 faizi ticarət; nəqliyyat vasitələrinin təmiri, 13 faizi sənaye, 8,6 faizi əhaliyə səhiyyə və sosial xidmətlərin göstərilməsi, 7,1 faizi dövlət idarəetməsi və müdafiə; sosial təminat, 6,6 faizi tikinti, 4,7 faizi nəqliyyat və anbar təsərrüfatı, 3,4 faizi peşə, elmi və texniki fəaliyyət, 3,2 faizi kənd təsərrüfatı, meşə təsərrüfatı və balıqçılıq, 1,6 faizi maliyyə və sığorta fəaliyyəti, 10,9 faizi iqtisadiyyatın digər sahələrində çalışıb.
2017-ci ilin yanvar-noyabr aylarında ölkə iqtisadiyyatında muzdla çalışan işçilərin orta aylıq nominal əməkhaqqı əvvəlki ilin müvafiq dövrünə nisbətən 6,2 faiz artaraq 525 manat olub.
