Müsavat həftədə 30 dəqiqə efir vaxtı istəyir
Müsavat Partiyası İctimai Televiziyadan efir vaxtı istəyir. Bu məqsədlə partiyanın başqanı Arif Hacılı İctimai Televiziya və Radio Yayımları Şirkətinin baş direktoru Cəmil Quliyevə məktubla müraciət edib.
Bastainfo.com-un məlumatına görə, məktubda deyilir ki, İTV siyasi partiyalara efir vaxtı ayırmağa borcludur. Vurğulanır ki, “İctimai televiziya və radio yayımı haqqında” qanuna əsasən, ictimai yayımçının əsas vəzifəsi ölkədə və dünyada baş verən mühüm hadisələr, dövlət orqanlarının, bələdiyyələrin, siyasi partiyaların, ictimai birliklərin, dini qurumların və kommersiya təşkilatlarının fəaliyyəti barədə vətəndaşlara qərəzsiz və tarazlaşdırılmış informasiya çatdırmaq, proqramlarda vətəndaşların öz fikirlərini bildirməsi üçün bərabər imkanlar yaratmaqdır.
“İctimai televiziya və radio yayımı haqqında” qanuna əsaslanan Arif Hacılı İTV-də Müavat Partiyasına həftədə bir dəfə 30 dəqiqə efir vaxtı ayrılmasını istəyib.
