Prezident 2018-i Xalq Cümhuriyyəti ili elan etdi
Prezident İlham Əliyev 2018-ci ili Azərbaycan Xalq Cümhuriyyəti ili elan edib. AZƏRTAC xəbər verir ki, dövlət başçısı bunu Nazirlər Kabinetinin 10 yanvar iclasında deyib, bununla əlaqədar həm ölkəmizdə, həm də xaricdə bir çox tədbirlərin keçiriləcəyini vurğulayıb.
2018-ci il mayın 28-də müsəlman Şərqində ilk parlamentli respublikanın – Azərbaycan Xalq Cümhuriyyətinin yaranmasının 100 ili tamam olur. 1918-ci il may ayının 28-də Azərbaycanın istiqlal bəyannaməsi qəbul edilib. Müstəqil respublika 1920-ci ilin aprel ayındakı bolşevik işğalınadək yaşayıb.
Novator.az xatırladır ki, 2007-ci il gənclər ili, 2009-cu il uşaq ili, 2010-cu il ekologiya ili, 2011-ci il turizm ili, 2012-ci il idman ili, 2013-cü il informasiya-kommunikasiya texnologiyaları ili, 2014-cü il sənaye ili, 2015-ci il kənd təsərrüfatı ili, 2016-cı il multikulturalizm ili, 2017-ci il islam həmrəyliyi ili elan olunmuşdu.
