İsa Qəmbərin təşkilatı planları müzakirə edib
Milli Strateji Düşüncə Mərkəzi yanvarın 9-da toplantı keçirib. Rəsmi məlumatda bildirilir ki, iclasda 2017-ci ilin yekunları qiymətləndirilib, ölkənin əsas problemlərinin mahiyyəti və onların həlli yollarına dair araşdırmaların, müzakirələrin və tədbirlərin önəmi, dövlətə, cəmiyyətə, demokratik düşərgəyə tövsiyələrin hazırlanması zərurəti vurğulanıb.
Qeyd olunub ki, 2018-ci ilin Azərbaycan Xalq Cümhuriyyətinin 100-cü ildönümü, o cümlədən prezident seçkisi ili olması qurumun fəaliyyətində mütləq nəzərə alınmalı, işğal altındakı torpaqların azad edilməsi, korrupsiyaya və insan haqlarının total pozulmasına qarşı cəmiyyətin müqavimət potensialının gerçəkləşdirilməsi və demokratik hakimiyyətin bərqərar edilməsi prioritet istiqamətlər olmalıdır.
İclasda son vaxtlar İranda baş verən proseslər də müzakirə edilib.
Milli Strateji Düşüncə Mərkəzinin ilk açıq toplantısının yanvarın 16-da keçirilməsi və onun “İstiqlal şəhidləri” mövzusuna həsr edilməsi qərara alınıb.
Milli Strateji Düşüncə Mərkəzinə İsa Qəmbər rəhbərlik edir.
Siyasətə 1980-ci illərin ikinci yarısında qoşulan İsa Qəmbər Azərbaycan Xalq Cəbhəsinin qurucularından, milli azadlıq hərəkatının liderlərindən biridir. 1990-1995-ci illərdə parlamentin deputatı, 1992-1993-cü illərdə Milli Məclisin sədri olub, 1992-ci il mayın 18-dən iyunun 17-dək prezident səlahiyyətlərini icra edib. 1992-2014-cü illərdə Müsavat Partiyasının başqanı postunu tutub.
