Oqtay Gülalıyevin müraciəti nəticə verib
Siyasi Məhbuslarsız Azərbaycan İctimai Alyansının rəhbəri Oqtay Gülalıyevin 2017-ci ilin sonunda Daxili İşlər Nazirliyinə ünvanladığı müraciət müsbət nəticə verib.
Müraciətində Oqtay Gülalıyev 6 ildir ümumvətəndaş pasportu (xarici pasport) ala bilmədiyini bildirmişdi.
Oqtay Gülalıyev 2012-ci ildə, aran rayonlarında daşqın yerlərində monitorinq aparan “Kür” Vətəndaş Cəmiyyətinin koordinatoru olduğu zaman ona cinayət işi qaldırılmışdı. Həmin iş 2016-cı ildə xətm olunsa da, hüquq müdafiəçisi xarici pasport ala və ölkədən çıxa bilmirdi.
“Azadlıq” radiosunun məlumatına görə, 2018-ci il yanvarın 8-də Oqtay Gülalıyev Daxili İşlər Nazirliyinin Baş Pasport, Qeydiyyat və Miqrasiya İdarəsinə dəvət olunub. İdarədə ona xarici pasport verilib, eyni zamanda ölkədən çıxışına heç bir qadağa olmadığı bildirilib.
