İtkin alpinistlərdən yeni xəbərlər
Qubada itkin düşmüş “Gilavar” idman klubunun üzvləri Namin Bunyatov, Babur Hüseynov və Fəridə Cəbrayılzadənin axtarış işləri yanvarın 7-də davam edib. Fövqəladə Hallar Nazirliyinin təşkil etdiyi axtarış-xilasetmə işlərinə nazirliyin xilasedici dəstələri, Ekologiya və Təbii Sərvətlər Nazirliyinin əməkdaşları və könüllülər qatılıb.
Xəbəri Fhn.gov.az yayıb.
2017-ci il dekabrın 23-də “Şahdağ” Milli Parkı ərazisindəki “Tufandağ” zirvəsi istiqamətində qalxan alpinistlərin itkin düşdüyü dekabrın 27-də bilinib. Baş Prokurorluğun və Fövqəladə Hallar Nazirliyinin birgə məlumatına görə, ilkin araşdırmalarla müəyyən edilib ki, Namin Bunyatov, Babur Hüseynov və Fəridə Cəbrayılzadə dekabrın 23-ü saat 14 radələrində “Tufandağ” zirvəsinə qalxmaq məqsədilə Xınalıq kəndindən “Şahdağ” Milli Parkının “Xınalıq” keçid məntəqəsinə gələrək zirvə istiqamətində hərəkət ediblər: “Hadisə ilə əlaqədar xüsusi mühafizə olunan təbiət əraziləri və obyektlərindən istifadə sahəsində qanunvericiliyin tələblərinə əməl edilməməsinə, habelə alpinistlərin ixtisası, təcrübəsi, hazırlıqlarının yürüşə imkan verib-verməməsi, meteoroloji şəraitin dağın zirvəsinə qalxmağa əlverişli olub-olmaması, marşrutun seçilməsi və təhlükəsizlik tədbirləri ilə bağlı digər məsələlərə nəzarət edilməsi sahəsində məsul şəxslərin öz xidməti vəzifələrini lazımi qaydada yerinə yetirməməsinə dair şübhələr üçün kifayət qədər əsaslar yarandığından Cinayət Məcəlləsinin 314.2-ci (ehtiyatsızlıqdan ağır nəticələrə səbəb olan səhlənkarlıq) maddəsi ilə cinayət işi başlanıb. Baş Prokurorluğun Ağır Cinayətlərə Dair İşlər üzrə İstintaq İdarəsində zəruri istintaq-əməliyyat tədbirləri həyata keçirilir”.
