Azərbaycan nefti üçillik rekordu təzələyib
Azərbaycan neftinin qiyməti son üç ilin maksimumuna çatıb. AZƏRTAC belə xəbər verir.
Yanvarın 5-də “AzəriLayt” markalı neftin bir barreli 70,54 dollara satılır. Bu, son 3 il 1 ayda qeydə alınan ən yüksək göstəricidir. “AzəriLayt”ın bir barreli sonuncu dəfə 2014-cü il dekabrın 5-də 70,60 dollara satılıb. Həmin gündən sonra ucuzlaşmağa başlayan Azərbaycan neftinin qiyməti 2015-ci ildə 38-70 dollar arasında dəyişib.
“AzəriLayt”ın bir barreli 2016-cı il yanvarın 21-də minimuma – 28,82 dollara enib. Daha sonra nisbətən bahalaşan Azərbaycan neftinin qiyməti 2016-cı ildə 28-57 dollar arasında yenilənib.
2017-ci ilin əvvəlində 57 dollara satılan “AzəriLayt”ın bir barreli ilin ortalarında 46 dollara geriləyib, dekabrda 69 dollaradək bahalaşıb.
Azərbaycan neftinin bir barreli 2001-ci ilin dekabrında minimuma enərək 19,15 dollara, 2008-ci ilin iyulunda isə maksimuma çataraq 149,66 dollara satılıb.
