Ötən il 5214 sabiq məhbus müavinət alıb
Əmək və Əhalinin Sosial Müdafiəsi Nazirliyi 2017-ci ildə penitensiar müəssisələrdən azad edilmiş 5214 nəfərə birdəfəlik müavinət ödəyib.
Bu təbəqədən olan şəxslərə minimum əməkhaqqının 4 misli qədər birdəfəlik müavinət verilir. Minimum aylıq əməkhaqqının 2018-ci il yanvarın 1-dən 130 manat müəyyən edilməsi ilə əlaqədar birdəfəlik müavinətin məbləği də 12,06 faiz artırılaraq 520 manata çatdırılıb.
Rəsmi hesabata görə, 2017-ci ildə 10-dan çox penitensiar müəssisənin peşə tədrisi bazalarında ümumilikdə 14 peşə hazırlığı kursu təşkil olunub. Həmin kurslara cəza müddəti başa çatmaqda olan 200 nəfər şəxs cəlb edilib. Peşə hazırlığı kurslarında avtomobillərin təmiri üzrə çilingər, elektrik-qaz qaynaqçısı, kompüter texnikasının təmiri, inşaat rəngsazı, dülgər-xarrat və s. peşələr üzrə bilik və bacarıqlar öyrədilib. Kursları bitirənlərə peşə şəhadətnamələri verilib.
2013-2017-ci illər ərzində penitensiar müəssisələrdə məhkumluq müddəti bitməkdə olan 780 nəfər peşə hazırlığına cəlb olunub.
