İranda yeni aksiyalar siqnalı
Yanvarın 3-ü Tehranda və ölkənin bir neçə kiçik şəhərində İranın dini lideri Əli Xamneyinin tərəfdarları aksiya keçirərək ona və hakimiyyətə dəstək veriblər. GünAzTV-nin məlumatına görə, Tehranda keçirilən aksiyaya əsasən şəhərin ətraf qəsəbələrindən gətirilən “Sepah” və “Bəsic” təşkilatlarının üzvləri, “Hizbullah”çılar, mülki geyimli təhlükəsizlik qurumlarının işçiləri, ruhanilər və onların ailə üzvləri, dövlət idarələrinin işçiləri qatılıb.
Əllərində Xamneyinin şəkillərini və yazılı plakatlar gəzdirən aksiyaçılar “Fitnəkara ölüm”, “Amerikaya ölüm”, “İsrailə ölüm” şüarları səsləndirib. Oxşar aksiyalar Buşehr, Qorqan, İslamabadi Qərb, Qum, Ərak, Nəhavənd, Əhvaz, Bocnurd və Xürrəmabad şəhərlərində də keçirilib.
Bir həftədir İranın 70-ə yaxın şəhərində hakimiyyətə və dini lider Əli Xamneyiyə qarşı keçirilən kütləvi etirazlarda azı 24 nəfər ölüb, onlarla aksiyaçı yaralanıb, 1000-dən çox insan həbs edilib. İlk etirazlar dekabrın 28-də Məşhəd şəhərində “Bahalığa yox” şüarı ilə başlanıb.
GünAzTV onu da bildirir ki, milli fəallar yanvarın 4-dən bütün Güney Azərbaycan şəhərlərində keçiriləcək aksiyalara dəvət olunub. Aksiyaların Azərbaycan türklərinə edilən zülmlərə qarşı olduğu, ana dildə təhsil, Urmu gölünün bərpası tələblərini əhatə edəcəyi deyilir. Məlumata görə, etirazlar yanvarın 4-dən hər gün saat 16-da şəhərlərin mərkəzi xiyabanlarında, Təbrizdə isə Rasta Küçədə keçiriləcək.
