Taleh Bağırova yeni ittihamın detalları
Həbsdə olan ilahiyyatçı Taleh Bağırova qarşı yeni cinayət işi üzrə ittihamın detalları bilinib.
Taleh Bağırov 2015-ci ilin noyabrında Daxili İşlər Nazirliyinin paytaxtın Nardaran qəsəbəsində keçirdiyi xüsusi əməliyyat zamanı tutulub, dövlətin konstitusiya quruluşunu zorla dəyişdirmək, şəriət qanunları ilə idarə edilən dini dövlət qurmaq məqsədilə silahlanaraq hakimiyyət nümayəndələrinə qarşı terror aktları törətməyi planlaşdırmaqda təqsirli bilinərək Bakı Ağır Cinayətlər Məhkəməsinin hökmü ilə 20 il müddətinə azadlıqdan məhrum edilib.
Hazırda Taleh Bağırov Qobustan həbsxanasında saxlanır. Yeni cinayət işi üzrə ittiham ona 2017-ci ilin dekabr ayının 27-də həbsxanada elan olunub. İttihamı Ədliyyə Nazirliyi İstintaq İdarəsinin müstəntiqi Taleh Bağırovun və onun vəkili Cavad Cavadovun iştirakı ilə elan edib.
2017-ci il iyulun 31-də Taleh Bağırovun üstündə yeddi ədəd “microSD” tipli yaddaş kartı aşkarlanıb. Yeni cinayət işi buna görə qaldırılıb.
Dekabrın 27-də elan olunan ittiham Cinayət Məcəlləsinin 317-2.1-ci maddəsinə əsaslanır. Məhbus qadağan olunmuş əşyaların saxlanılması, gəzdirilməsi, daşınması və ya istifadəsində ittiham edilir. Bu əməl 6 ayadək müddətə azadlıqdan məhrumetmə ilə cəzalandırılır.
Vəkil Cavad Cavadov “Turan”a deyib ki, keçirilmiş ekspertizalar Taleh Bağırovda aşkarlanmış yaddaş kartlarında “Qurani Kərim”in mətninin, təsvirinin və başqa məlumatların olduğunu göstərib. Vəkil bunların qadağan edilmiş məlumatlar olmadığını söyləyir: “Taleh Bağırov özünü təqsirli bilmir, ittihamı qəbul etmir və ifadə vermir. İfadəni məhkəmədə verəcəyini bildirir. Bu səbəbdən ittihama onun münasibəti haqda bundan artıq nəsə deyə bilmərəm”.
Vəkilin sözlərinə görə, cinayət işinin istintaqı tamamlanıb və hazırda proses müdafiə tərəfinin iş materialları ilə tanışlığı mərhələsindədir.
