Hüquq müdafiəçisi nazirliyi məhkəməyə verə bilər
Siyasi Məhbuslarsız Azərbaycan İctimai Alyansının rəhbəri Oqtay Gülalıyev Daxili İşlər Nazirliyinə müraciət edib. O, 6 ildir ümumvətəndaş pasportu (xarici pasport) ala bilmədiyini bildirir.
Oqtay Gülalıyev yazır ki, 2012-ci ildə, aran rayonlarında daşqın yerlərində monitorinq aparan “Kür” Vətəndaş Cəmiyyətinin koordinatoru olduğu zaman ona cinayət işi qaldırılıb. Hüquq müdafiəçisi bu cinayət işinin qurama olduğunu iddia edir.
Cinayət işi 2016-cı ildə xətm olunub, amma Oqtay Gülaliyevin ölkədən çıxışına qadağa götürülməyib.
Daxili İşlər Nazirliyinə müraciətində Oqtay Gülalıyev vurğulayır ki, xarici pasport almaqdan ötrü dövlət rüsumu ödəyib. Amma “ASAN xidmət”dən ona Daxili İşlər Nazirliyinə müraciət etmək məsləhət görülüb.
Hüquq müdafiəçisi xatırladır ki, 2016-cı ildə belə müraciətdən sonra onu Bakıdakı 37 saylı polis bölməsinə aparıblar, iki saat saxlandıqdan sonra buraxıblar.
Oqtay Gülalıyev nazirliyə müraciətində bildirir ki, bu quruma son dəfə üz tutur, problem həllini tapmasa, məhkəməyə müraciət etmək niyyətindədir.
“Amerikanın səsi”nin məlumatına görə, Oqtay Gülalıyevin müraciətinə hələlik Daxili İşlər Nazirliyindən münasibət almaq mümkün olmayıb.
Oqtay Gülalıyev “Kür” Vətəndaş Cəmiyyəti Qərargahının koordinatoru kimi 2012-ci ilin aprel ayında Sabirabadda, çay daşqınından ziyan çəkmiş vətəndaşlarla görüşərkən tutulmuşdu. Sabirabad Rayon Məhkəməsi Cinayət Məcəlləsinin 220.2-ci maddəsi ilə (hakimiyyət nümayəndəsinin tələblərinə fəal şəkildə müqavimət göstərmə və kütləvi iğtişaşlara, vətəndaşlara qarşı zorakılığa çağırış) ittiham olunan Oqtay Gülalıyev barəsində 2 aylıq həbs qətimkan tədbiri seçmiş, iyun ayında həbs qətimkan tədbiri ləğv edilmişdi.
Cinayət işi 2016-cı ilin oktyabrında xətm olunub.
