Alpinistlərin axtarışı: FHN xəbərdarlıq edir
Fövqəladə Hallar Nazirliyi (FHN) Quba rayonu ərazisində dağlıq ərazidə itkin düşmüş alpinistlərin axtarışları ilə bağlı açıqlama yayıb.
“Gilavar” hava və ekstrim idman klubunun üzvləri Hüseynov Babur Vaqif oğlu, Bünyatzadə Namin Nizami oğlu və Cəbrayılzadə Fəridə Cəbiyulla qızı dekabrın 23-də Quba rayonunun Xınalıq kəndindən Tufandağ istiqamətində yürüşə çıxıblar.
Dekabrın 26-da FHN-in Böhran Vəziyyətlərində İdarəetmə Mərkəzinə alpinistlərin geri qayıtmadığı və onlarla əlaqənin kəsildiyi barədə məlumat daxil olub. Aviasiya dəstəsi axtarışlara başlayıb. Axtarışa helikopterlər cəlb olunub.
Dekabrın 27-də açıqlama yayan FHN bildirib ki, alpinistlərin axtarışlarının aparılması üçün könüllü dəstələrin yaradılması ilə bağlı müxtəlif çağırışlar səslənir: “Fövqəladə Hallar Nazirliyi axtarışların mürəkkəb relyefi olan yüksək dağ massivində aparıldığını, eləcə də meteoroloji şəraiti nəzərə alaraq xəbərdarlıq edir ki, müvafiq geyim, rabitə vasitələri və digər xilasetmə ləvazimatları ilə təchiz olunmamış, həmçinin xüsusi hazırlıq keçməmiş şəxslərin həmin ərazilərə getməsi onların həyatı üçün təhlükəlidir.
Fövqəladə Hallar Nazirliyi kütləvi informasiya vasitələrinə, ictimaiyyət nümayəndələrinə, sosial şəbəkələrin istifadəçilərinə müraciət edərək nazirliyin fəaliyyəti, xüsusilə də baş verən hadisələrlə bağlı rəsmi olmayan, dəqiqləşdirilməmiş məlumatlardan istifadə etməməyə çağırır və bu cür məlumat yayanlara diqqətli olmağı, yaranmış vəziyyətə həssaslıqla və anlayışla yanaşmağı tövsiyə edir. Axtarış-xilasetmə işləri barədə əlavə məlumat veriləcək”.
AZƏRTAC xəbər verir ki, dekabrın 28-də alpinistlərin axtarışlarına Fövqəladə Hallar Nazirliyinin aviasiya dəstəsinin “Mi-17” markalı helikopteri, Şimal Regional Mərkəzinin axtarış-xilasetmə qrupu, FHN-in Xüsusi Riskli Xilasetmə Xidmətinin dağ-xilasetmə dəstəsi və alpinistlər cəlb olunub.
