Rəsmilərin qeyri-rəsmi sammiti
Prezident İlham Əliyev dekabrın 26-da MDB Dövlət Başçıları Şurasının iclasında iştirak edib. Rusiyanın paytaxtı Moskvada, “Novo-Oqaryovo” dövlət iqamətgahına keçirilən qeyri-rəsmi sammitə Rusiya prezidenti Vladimir Putin, Belarus prezidenti Aleksandr Lukaşenko, Moldova prezidenti İqor Dodon, Ermənistan prezidenti Serj Sərkisyan, Qazaxıstan prezidenti Nursultan Nazarbayev, Özbəkistan prezidenti Şövkət Mirziyayev, Tacikistan prezidenti İmaməli Rəhman, Qırğızıstan prezidenti Sooronbay Jeenbekov da qatılıb.
Dövlət başçıları görüşdə çıxış ediblər. Sonra Vladimir Putinin adından MDB dövlət başçılarının şərəfinə rəsmi qəbul təşkil olunub.
Novator.az-ın məlumatına görə, Vladimir Putin çıxışında deyib ki, 2017-ci ilin 10 ayında MDB ölkələri arasında mal dövriyyəsi 25,7% artaraq 94 milyard dollardan 117 milyard dollara çatıb. Onun sözlərinə görə, MDB ölkələrinin üçüncü ölkələrlə ticarətində 24% artım qeydə alınıb.
MDB-nin əsası Rusiya, Belarus və Ukrayna dövlət başçılarının 8 dekabr 1991-ci ildə imzaladığı sazişlə qoyulub. 21 dekabr 1991-ci ildə keçmiş SSRİ-nin daha 8 respublikası – Moldova, Azərbaycan, Ermənistan, Qazaxıstan, Özbəkistan, Türkmənistan, Qırğızıstan, Tacikistan sazişi imzalayaraq MDB-yə qoşulublar.
1993-cü il dekabrın 9-da Gürcüstan da MDB-yə üzv olub, ancaq 18 avqust 2009-cu ildə bu qurumdan ayrılıb.
2014-cü ildən başlayaraq Ukrayna MDB tədbirlərinə nadir hallarda qatılır.
