Obama qəribsəyib
2009-2017-ci illərdə ABŞ-ın prezidenti olmuş Barak Obama BBC radiosuna müsahibəsində əvvəlki işindən ötrü darıxdığını vurğulayıb.
Novator.az-ın məlumatına görə, sabiq prezident deyib ki, 2017-ci ilin yanvarında dövlət başçısı postundan ayrılandan sonra rahat yaşayır: “Prezident olanda sıx qrafikim vardı. İndi isə sərbəstəm, günümü azad şəkildə bölə bilirəm”.
Obama yuxudan gec ayıldığını bildirərək qeyd edib ki, məsələn, səhərlər həyat yoldaşı ilə 45 dəqiqə söhbətləşmək, uzun səhər yeməyi yemək imkanı var: “Yalnız bunlardan sonra hansısa işə başlayıram”.
Ancaq sabiq prezident əvvəlki işindən ötrü darıxdığını vurğulayıb. O deyib ki, Ağ evdə birgə salışdığı komandasından, mütəxəssislərdən ötrü qəribsəyib: “Həm də intensiv iş çatışmazlığı duyuram”.
56 yaşlı Obamanın siyasi karyerası İllinoys ştatının Senatından başlayıb. O, 1997-ci ildən 2004-cü ilə qədər ştat Senatında Demokratlar Partiyasını təmsil edib. 2004-cü ildən ABŞ Senatının üzvü olub. 2008 və 2012-ci illərdə ABŞ prezidenti seçilib.
